Цэнтральная падзея гэтага года, які ў католікаў аб’яўлены Годам веры – урачыстасці з выпадку 400-годдзя Будслаўскай іконы Божай Маці, адной з галоўных каталіцкіх святынь Беларусі, якія праходзяць пад дэвізам “Марыя – маці нашай веры”. Зараз копія гэтай іконы вандруе па каталіцкіх парафіях, і нядаўна адбылася яе перэгрынацыя у каталіцкім касцёле ў Чавусах. Тут прайшлі святочныя  богаслужэнні. Святыня знаходзілася ў нашым горадзе два дні для пакланення вернікаў.

Як расказаў а. Гжэгаж Ксёнжэк, піяр, пробашч парафіі п.т.  НПМ-Маці Касцёла ў Чавусах,  цудадзейны абраз Маці Божай Будслаўскай знаходзіцца ў Будславе  і шырока вядомы  ў 17-18 стагоддзях. Абраз у 1598 годзе быў падараваны ў Рыме Папам Кліментам VIII мінскаму ваяводу Яну Пацу, калі той перайшоў з кальвінізму ў каталіцтва. Ваявода вельмі шанаваў абраз і заўсёды вазіў з сабой. Пасля яго смерці абраз дастаўся яго капеляну Ісаку Салакаю, пазней – даўгінаўскаму вікарыю, які праз нейкі час ахвяраваў яго будслаўскаму касцёлу.

Абраз стаў карыстацца пакланеннем простага люду, праславіўся рознымі цудамі.  Гісторыя і цуды абраза былі апісаны прыёрам Элеўтэрыем Зеляевічам у кнізе “Задыяк на зямлі”. Першы цуд, зафіксаваны ў 1617 годзе – вяртанне зроку 5-гадоваму хлопчыку. У той жа дзень Рэджынальд Тышкевіч пазбавіўся ад падучай хваробы, якая мучыла яго сем гадоў. Зеляевіч апісаў 42 цудоўныя аздараўленні з дапамогай абраза. Ён таксама згадваецца ў кнізе А. Каяловіча аб літоўскіх святынях, у еўрапейскіх кампендыумах В.Гумпенберга. Неназваныя кнігі пра абраз пералічаны ў вопісе кляштарнай бібліятэкі за 1822 год. Тут у гэты час яшчэ захоўвалася рукапісная кніга цудаў Маці Божай Будскай, а таксама тры гравёрныя дошкі з выявай абраза.

Будслаўскі абраз карыстаўся шанаваннем найперш у літоўскай правінцыі бернардынцаў, у некаторых касцёлах асобныя алтары былі прысвечаны Маці Божай Будскай (напрыклад, у Магілёве). Са скасаваннем ордэна бернардынцаў касцёл застаўся парафіяльным, але прапаганда культу абраза аслабла. Тым не менш, у міжваенных “Каталогах Віленскай Дыяцэзіі” сярод 10 касцёлаў з цудадзейнымі абразамі Маці Божай згаданы і будслаўскі. У наш час Маці Божая Будслаўская становіцца агульнабеларускай  святыняй, сведчаннем чаго з’явілася каранацыя абраза 2 ліпеня 1998 года.

З 1992 года адроджана традыцыя пілігрымак у Будслаў.

Запісала Н.КАЛЕСНІКАВА.